كوشتنی رۆژنامه‌نووسێك، خنكاندنی دیمۆكراسییه‌

تایبه‌ت/ سه‌نته‌ری جێنده‌ر 11-5-2010
به‌ ناوی دیمۆكراسی راسته‌قینه‌ و به‌ ناوی ئازادی راده‌ربڕین.
له‌ سه‌ده‌ی بیست و یه‌كه‌مدا كوشتنی بیر وڕایه‌ك، كوشتنی مرۆڤایه‌تییه‌. له‌ناوبردنی رۆژنامه‌نووسێك، له‌ناوبردنی ئازادی راده‌ربڕینه‌. له‌ سه‌ده‌ی زانست و بانگه‌وازی بۆ مافی مرۆڤ، بێسه‌ر وشوێنكردن و تیرۆركردنی رۆژنامه‌نووسێك، پێشێلكردنی رای میلله‌تێكه‌، پێشلكردنی هوشیاربوونه‌وه‌ی نه‌ته‌وه‌یه‌كه‌. له‌ سه‌ده‌ی بیست و یه‌كه‌مدا رفاندنی رۆژنامه‌نووسان، سه‌ركوتكردنی هوشیاری جیلی نوێیه‌ و ترس خستنه‌ دڵی هه‌موو خێزانێكه‌. خورپه‌ی دڵی دایكێك و راچڵه‌كانی ناخی دایكێكه‌ كاتێك رۆڵه‌كه‌ی ده‌كوژرێت. كورد كه‌چه‌ندین ساڵه‌ له‌پێناو ئازادیدا تێده‌كۆشێت، ئێستا له‌ وڵاته‌كه‌یدا، له‌ ژێر ئه‌و ئاڵایه‌ كه‌هه‌زاران شه‌هیدی ئازا گیانیان له‌پێناو وه‌ته‌ندا به‌ختكردووه‌، ئازادی و دیموكراسی ده‌مكوت ده‌كرێت. ئێمه‌ وه‌ك سه‌نته‌ری نیشتمانی بۆ لێكۆڵینه‌وه‌ی جێنده‌ر كوشتنی رۆژنامه‌نووس "سه‌رده‌شت عوسمان" ئیدانه‌ ده‌كه‌ین و ئه‌و كه‌سانه‌ شه‌رمه‌زارن له‌به‌رامبه‌ر مێژووی مرۆڤایه‌تیدا كه‌ له‌ژێر ناوی نه‌ته‌وه‌یه‌كدا، له‌ژێر ناوی دیموكراسیدا رۆژنامه‌نووسان ده‌كوژن و سه‌ركوتیان ده‌كه‌ن. داوا له‌لایه‌نه‌ په‌یوه‌ندیداره‌كانی حكومه‌ت و هه‌موو رێكخراوه‌ نێونه‌ته‌وه‌ییه‌كانی جیهان ده‌كه‌ین كه‌هه‌ڵویستی جدی خۆیان له‌هه‌مبه‌ر ئه‌م كاره‌ بێ شه‌رمانه‌دا ده‌رببڕن و ئه‌و كه‌سانه‌ ده‌ستیان هه‌بووه‌ له‌م كاره‌دا راكێشی به‌رده‌م یاسا بكرێن بۆ ئه‌وه‌ی جارێكی تر ئه‌م رووداوه‌ دژه‌ مرۆڤانه‌یه‌ له‌كوردستاندا روونه‌داته‌وه‌.