جامی سوپه‌ری ئیسپانیا.. به‌رشه‌لۆنه‌ ده‌یه‌وێت پارێزگاری له‌ژماره‌ی پێوانه‌یی بكات

والی شێخ عه‌لی 14-8-2011
سه‌عات 8 ی ئه‌مشه‌و 14/15-8 به‌كاتی گرینج هه‌ردوو یانه‌ی ریاڵ مه‌دریدو به‌رشه‌لۆنه‌ له‌یاری چوونی جامی سوپه‌ری ئیسپانیدا روبه‌ڕووی یه‌كده‌بنه‌وه‌.
یارییه‌كه‌ له‌ستادیۆمی سانتیاگۆ بێرنابیۆ له‌شاری مه‌دریدی پایته‌خت به‌ڕێوه‌ده‌چت كه‌ یاریگای ره‌سمی یانه‌ی شاهانه‌یه‌.
سه‌عات 9 ی شه‌وی چوارشه‌ممه‌ش ئه‌و دوو یانه‌یه‌ یاری گه‌ڕانه‌وه‌ له‌ستادیۆمی كامپ نو ئه‌نجامده‌ده‌ن كه‌ یاریگای ره‌سمی یانه‌ی كه‌ته‌له‌نۆییه‌.
به‌درێژایی مێژووی ئه‌م پاڵه‌وانێتییه‌ كه‌ له‌نێوان هه‌ردوو پاڵه‌وانی خولی پله‌یه‌كی ئیسپانی و جامی شاهانه‌ی ئیسپانیادا ئه‌نجامده‌درێت و له‌ساڵی 1982 ه‌وه‌ دامه‌زراوه‌، تائێستا یانه‌ی به‌رشه‌لۆنه‌ خاوه‌نی ژماره‌ی پێوانه‌ییه‌ له‌ڕووی به‌ده‌ستهێنانی نازناوه‌وه‌ كه‌ 9 جاره‌، یانه‌ی ریاڵ مه‌دريدیش به‌دوای ئه‌ودا دێت كه‌ 8 نازناوی به‌ده‌ستهێناوه‌، به‌دوای ئه‌میشدا یانه‌ی دیپۆرتیڤیۆ لاكۆرۆنیا دێت كه‌ سێ نازناوی مسۆگه‌ركردووه‌.